இயற்கைக்கு நன்றி கூறும் தமிழர் திருநாளான "பொங்கல் பெருவிழா", இயற்கை எழில் கொஞ்சும் மேக்நா கலை மற்றும் அறிவியல் கல்லூரியில், 13.01.2026 செவ்வாயன்று உற்சாகமும் உவகையும் தளும்ப இனிதே கொண்டாடப்பட்டது.

பல்வேறு கலைப் போட்டிகள், எழுச்சிமிகு சிறப்புரை, உற்சாக ஆட்டம் பாட்டம் என பேரெழில் பூண்டது, இப்பொங்கல் விழா.

மேக்நா கலை மற்றும் அறிவியல் கல்லூரியின் நிறுவுநர் மற்றும் தலைவர் மதிப்பிற்குரிய திரு நாயகம் தேவதாஸ் அவர்கள், கல்லூரியின் துணைத் தலைவர் மதிப்பிற்குரிய திருமதி ரூபி தேவதாஸ் அவர்கள், கல்லூரி முதல்வர் மதிப்பிற்குரிய முனைவர் ஜெயச்சந்திரன் அவர்கள், கல்லூரியின் இயக்குநர் மதிப்பிற்குரிய திரு ஜெர்ரி பிரசாந்த் அவர்கள் என அனைவரும் நிகழ்வைத் துவங்கி வைத்து பொங்கல் வாழ்த்துகளை பரிமாறினர்.

காலை பத்து மணியளவில் உறியடி, கயிறு இழுத்தல், கோலம் இடுதல் உள்ளிட்ட போட்டிகளோடு பொங்கல் கொண்டாட்டம் கலைகட்டத் தொடங்கியது.

மாணவர்கள் ஆர்வமுடனும், மாணவியர் எவ்விதத் தயக்கமும் இல்லாமலும் உறியடி, கயிறு இழுத்தல் போட்டிகளில் பங்கேற்று வாகை சூடியமை பெரும் வியப்பைத் தந்தது.

கல்லூரி சார்பில் "பெரும் பானையில்" பொங்கல் இட்டனர். அதோடு கலை அறிவியல் துறை மாணவர்கள் தங்களின் பேராசிரியர்களோடு இருகுழுக்களாக பொங்கல் வைத்து மகிழ்ந்தனர். சூரியனுக்கும் இயற்கைக்கும் பொங்கலைப் படையலிட்டு நன்றி கூறி மகிழ்ந்தார் நம் கல்லூரியின் துணைத் தலைவர் மதிப்பிற்குரிய திருமதி ரூபிதேவதாஸ் அவர்கள்.

பொங்கல் விழாவிற்கு நம் கல்லூரியின் இயக்குநர் மதிப்பிற்குரிய திரு ஜெர்ரி பிரசாந்த் அவர்கள் தம் வாழ்வினையர் மதிப்பிற்குரிய திருமதி புஷ்ப யாழினி அவர்களுடன் பங்கேற்றது விழாவை மேலும் அழகாக்கியது.

கல்லூரி மாணவர்கள், தமிழர்தம் மரபான சேலை, தாவணியில் அழகிய தமிழ் மகள்களாகவும், வேட்டியில் அழகிய தமிழ் மகன்களாகவும் தோற்றத்தில் நம் மனங்களை கொள்ளையிட்டனர்.

பதினோறு மணியளவில் தமிழ்த்தாய் வாழ்த்துடனும், இறுதியாண்டு வணிகவியல் துறை மாணவியின் வரவேற்பு நடனத்துடனும் பொங்கல் விழாப் பேருரை ஆரம்பமானது.

கலை, அறிவியல் துறையை சார்ந்த முதல் மற்றும் இறுதியாண்டு மாணவர்கள் "மக்கள் இசைப் பாடல்களுக்கு", மண்மனம் கமழும் நடனம் வழங்கினர்.

படைப்பாளர், தமிழ் ஆய்வாளர் மற்றும் ஆர்வலர், பெண்ணிய சிந்தனையாளர், இலக்கிய நடுவர், பேராசிரியர் எனப் பன்முகத் திறன் கொண்ட முனைவர் "ஆதிரா முல்லை" அவர்கள், சிறப்பு அழைப்பாளராக வருகை தந்திருந்தார். அவருடைய உரைவீச்சு சிறப்புரையாக மட்டுமின்றி, மாணவர்கள் உடனான இனிய கலந்துரையாடலாகவும் இருந்தது. இயல்புத் தமிழில் அமைந்த ஆதிரா முல்லை அவர்களின் அழுத்தமான, நம்பிக்கை நிறைந்த நற்கருத்துகள் நகைச் சுவையுடன் வெளிப்பட்டு மாணவ மனங்களை ஈர்த்தது.

"கனாக் கண்டேன்" எனும் பொருளில் சிறந்த கவிதையை வழங்கிய முதலாமாண்டு மாணவருக்கு தன் அன்பு நிறைந்த வாழ்த்துகளையும் ஆதிரா முல்லை அவர்கள், அள்ளித் தந்தார்.

பொங்கல் கலைப் போட்டிகளில் வெற்றி பெற்ற மாணவர்களுக்கும் பரிசுகளை வழங்கினார்.

இப்பொங்கல் கொண்டாட்டத்தின் முத்தாய்ப்பாய் அமைந்தது, நிகழ்வின் இறுதியில் நடந்தேறிய "உற்சாக ஆட்டம் பாட்டமே" எனலாம்.

பன்னிசைப் பாடல்களுக்கு ஏற்ப மாணவ மாணவியர் தங்களின் உள்ளங்களிலும் முகங்களிலும் மகிழ்ச்சி கொப்புளிக்க இன்ப நடனத்தில் திளைத்தனர்.

நிகழ்வின் நிறைவில் வணிகவியல் துறைத் தலைவர் பேராசிரியர் ரேவதி அவர்கள் நன்றியுரை வழங்கினார்.

பொங்கல் பெருவிழாக் கொண்டாட்டத்தை கணியியல் துறைத் தலைவர் பேராசிரியர் திருமலை, தமிழ்த்துறையின் பேராசிரியர் இரா பகுத்தறிவு, வணிகவியல் துறைத் தலைவர் பேராசிரியர் ரேவதி ஆகியோர் ஒருங்கிணைத்தனர். பேராசிரியர்கள் அனைவரும் நிகழ்வின் இறுதிவரை மாணவர்களை நெறிப்படுத்தினர்.

பொங்கல் கொண்டாட்டத்தால் நம் கல்லூரியின் விளையாட்டுத் திடலே வண்ணங்களால் நிரம்பித் தளும்பியது.